სერია 1/16
1/16 პატარა, მაღალხარისხიანი არტ-წიგნების სერიაა, რომლის მიზანია ქართულ ხელოვნებაში მიმდინარე პროცესები მეტი ადამიანისთვის გახადოს საინტერესო და ხელმისაწვდომი. ვცდილობთ, სერია რაც შეიძლება მრავალფეროვანი გავხადოთ და სათანამშრომლოდ მოვიწვიოთ განსხვავებული ასაკისა და გამოცდილების მქონე, სხვადასხვა ჟანრსა და სფეროში მომუშავე ყველაზე საინტერესო ავტორები.
არტ-წიგნი იმთავითვე გასამრავლებლადაა განკუთვნილი. მისი ყოველი ასლი სრულფასოვანი ორიგინალია, რომლის ღირებულება არა მის უნიკალურობაში, არამედ მის ხელმისაწვდომობაშია. ხელოვანისთვის ეს არის ავტონომიური პლატფორმა შემოქმედებითი იდეების გასაზიარებლად, მაყურებლისთვის კი - პორტალი ხელოვნების სამყაროში.
1/16 მხარდამჭერები
1/16 სერიის ხელმისაწვდომობის შესანარჩუნებლად, გადავწყვიტეთ მიგვემართა ორგანიზაციებისა და ადამიანებისთვის, რომელთა სწრაფვა თავ-თავიანთ სფეროში უკომპრომისოდ მაღალი ხარისხის შესაქმნელად წლების განმავლობაში ჩვენს აღტაცებას და უდიდეს პატივისცემას იწვევს. მადლიერებით წარმოგიდგენთ ჩვენს მხარდამჭერებს.
თუკი თვლით, რომ აუცილებელია, ადამიანებს არა მხოლოდ სასიცოცხლო მინიმუმზე, არამედ ხარისხიანი პროდუქტით მიღებულ სიამოვნებაზე მიუწვდებოდეთ ხელი, შემოუერთდით ჩვენს პროექტს. მხარდამჭერთა მცირე ჯგუფის მოკრძალებული შენატანი შესაძლებლობას მოგვცემს, სერიის დაბალი გასაყიდი ფასი შევინარჩუნოთ.
